Mbreti Charles dhe Mbretëresha Camilla morën pjesë të dielën në meshën tradicionale të Pashkëve në Kapelën e Shën George në Windsor, të shoqëruar nga anëtarë të tjerë të Familjes Mbretërore. Vëmendjen e tërhiqte rikthimi i Princit të Uellsit dhe Catherine, Princeshës së Uellsit, e cila kishte munguar në këtë ceremoni për dy vite radhazi.
Ndryshe nga viti i kaluar, Andrew Mountbatten-Windsor, ish-bashkëshortja e tij Sarah Ferguson dhe vajzat e tyre, Princeshat Beatrice dhe Eugenie, nuk ishin të pranishëm pasi, sipas burimeve, kanë bërë “plane alternative” për Pashkë.
Princi William dhe Catherine u pritën me duartrokitje teksa hynë në kapelë së bashku me tre fëmijët e tyre: Princin George, 12 vjeç, Princeshën Charlotte, 10 vjeçe dhe Princin Louis, 7 vjeç. Charlotte i përshëndeti me dorë qytetarët që i prisnin pas barrierave. Familja e Uellsit mungoi vitin e kaluar për shkak të një pushimi familjar në Norfolk, dhe vitin para atij pasi Catherine ishte në fazat e para pas diagnostikimit me kancer.
Në shërbesë morën pjesë gjithashtu Princesha Anne me bashkëshortin Sir Tim Laurence, si dhe Princi Edward me familjen e tij. Mbreti dhe Mbretëresha mbërritën të fundit, ndërsa një qytetar dëgjohej të thoshte “Zoti e bekoftë Mbretin”. Në dalje, çifti mbretëror përshëndeti publikun dhe u uroi besimtarëve një Pashkë të mbarë. Mbretëresha tha se shërbesa kishte qenë “e mirë”.
Këtë vit, Mbreti nuk publikoi një mesazh zyrtar për Pashkët. Të enjten, ai dhe Mbretëresha Camilla morën pjesë në shërbesën tradicionale të Maundy Day në Denbighshire, ku Mbreti i dhuroi simbolikisht 77 burrave dhe 77 grave që janë shquar për shërbesë të krishterë dhe kontribut në komunitet.
Ndërkohë, Andrew Mountbatten-Windsor – i cili është hequr nga titujt mbretërorë dhe po hetohet pas arrestimit nën dyshime për abuzim me detyrën – është zhvendosur në Sandringham, Norfolk. Ai dhe familja e tij vijojnë të jenë në qendër të skandalit Epstein, megjithëse ai mohon çdo përfshirje të paligjshme.
Kjo e diel shënoi gjithashtu predikimin e parë të Pashkëve nga kryeipeshkëvia e re e Canterbury-t, Dame Sarah Mullally, e cila gjatë fjalës së saj bëri thirrje për t’i dhënë fund “dhunës dhe shkatërrimit” në Lindjen e Mesme, teksa lufta SHBA–Izrael kundër Iranit ka hyrë në javën e gjashtë.
