Suplementet e magnezit po promovohen gjithnjë e më shumë në rrjetet sociale si një zgjidhje për pagjumësinë, por ekspertët thonë se provat shkencore që mbështesin këtë pretendim janë ende të kufizuara.
Magnezi është një mineral thelbësor për organizmin dhe merr pjesë në më shumë se 300 procese biologjike në trup, duke përfshirë prodhimin e hormonit të gjumit, melatoninës. Ai ndihmon gjithashtu në rregullimin e presionit të gjakut, nivelit të sheqerit, prodhimit të energjisë dhe shëndetin e kockave, muskujve dhe trurit.
Sasia e rekomanduar ditore për të rriturit varion nga 310 deri në 420 miligramë, të cilat mund të merren nga ushqime si perimet me gjethe të errëta, fasulet, arrat, farat dhe drithërat e plota.
Sipas ekspertëve, disa studime të vogla sugjerojnë se suplementet e magnezit mund të përmirësojnë cilësinë e gjumit dhe të ndihmojnë njerëzit të flenë më shpejt, por cilësia e këtyre studimeve mbetet e kufizuar.
Forma të ndryshme të magnezit – si magnez glicinat, citrat, malat, oksid apo L-treonat – përthithen në mënyra të ndryshme nga organizmi dhe mund të kenë efekte të ndryshme. Magnezi glicinat konsiderohet më i përshtatshëm për gjumin, ndërsa citrati mund të ketë efekt laksativ.
Ekspertët paralajmërojnë se, megjithëse suplementet mund të ndihmojnë në disa raste, ato nuk duhet të shihen si një zgjidhje magjike për pagjumësinë. Marrja e më shumë se 350 miligramëve magnez nga suplementet mund të shkaktojë efekte anësore serioze, si presion të ulët të gjakut, të vjella, rrahje të parregullta të zemrës dhe vështirësi në frymëmarrje.
Mjekët këshillojnë që para se të përdoren suplemente, njerëzit duhet të përmirësojnë zakonet e gjumit dhe të konsultohen me një specialist, veçanërisht nëse vuajnë nga sëmundje të veshkave, të zemrës apo të sistemit tretës.
