Ed Sheeran ka hapur koncertin e tij solo në Filadelfia me një deklaratë të gjatë për Gazën, në daljen e parë publike pas krizës që përfshiu turneun e tij amerikan “Loop”. Këngëtari e cilësoi situatën në Gaza “katastrofike dhe të pajustifikueshme”.
“Zemra më është thyer nga përmasa e shkatërrimit dhe humbjes së jetëve të civilëve, të fëmijëve”, tha Sheeran para publikut. Ai shtoi se koncertet dhe muzika e tij janë menduar si hapësira uniteti dhe humanizmi, jo si arena politike.
Në të njëjtën deklaratë, Sheeran pranoi se sulmi i Hamasit më 7 tetor 2023 ishte “i tmerrshëm”, por theksoi se kjo nuk mund të justifikojë shkallën e vrasjeve dhe shkatërrimit në Gaza. Ai foli edhe për Bregun Perëndimor, duke e quajtur zgjerimin e vendbanimeve hebraike dhe padrejtësinë ndaj palestinezëve pjesë të një realiteti “të pajustifikueshëm”.
Këngëtari tha gjithashtu se ditët e fundit kishte dyshuar nëse turneu do të vazhdonte dhe madje “nëse donte ende të ishte artist”, pas kritikave dhe presionit publik. Sipas tij, vendimi për heqjen e Macklemore si artist hapës nuk ishte marrë personalisht prej tij, por nga promotorët e turneut, pas kundërshtimeve të pronarëve të stadiumeve ku do të mbaheshin koncertet.
Kriza nisi pasi Macklemore thirri “Free Palestine” gjatë një performance në New Jersey. Pas kësaj, ai u hoq nga programi i koncerteve të Sheeran, ndërsa disa artistë të tjerë, mes tyre Finneas, Lukas Graham, Aaron Rowe dhe grupi Beoga, u tërhoqën në shenjë solidariteti me të.
Jashtë stadiumit në Filadelfia, një grup protestuesish pro-palestinezë pritën publikun me flamuj palestinezë dhe thirrje “Free, free Palestine”. Sheeran, nga skena, u përpoq ta vendoste deklaratën e tij mes dy linjave: distancimit nga censura ndaj artistëve dhe shmangies së shndërrimit të koncertit në një tubim politik.
