Kryeministri britanik Keir Starmer pret sot paradite në Downing Street presidentin ukrainas Volodymyr Zelensky, në një takim të profilit të lartë që synon të shfaqë unitetin e Europës para samitit të së premtes në Alaska mes presidentit amerikan Donald Trump dhe presidentit rus Vladimir Putin.
Starmer deklaroi se ekziston një “mundësi reale” për arritjen e një armëpushimi mes Rusisë dhe Ukrainës, por theksoi se ai duhet të jetë i qëndrueshëm dhe i shoqëruar me garanci sigurie. Ai rikujtoi se “integriteti territorial i Ukrainës duhet të mbrohet dhe kufijtë ndërkombëtarë nuk mund të ndryshohen me forcë”, duke nënvizuar se për këtë arsye është krijuar një “koalicion i të gatshmëve” – vende kryesisht europiane që kanë premtuar mbështetje ushtarake, madje edhe me trupa në terren, për të garantuar respektimin e çdo marrëveshjeje paqeje.
Takimi vjen pasi Zelensky dhe kancelari gjerman Friedrich Merz biseduan dje me Trump dhe liderë të tjerë europianë, duke kërkuar më shumë presion ndaj Putinit nëse nuk arrihet një marrëveshje. Trump ka paralajmëruar “pasoja shumë të rënda” për Rusinë nëse refuzon të ndalë luftën, por ka lënë të hapur mundësinë e “shkëmbimeve territoriale”, gjë që ka ngritur shqetësime në Kiev.
Ukraina ka përsëritur se nuk do të pranojë asnjë marrëveshje që i lë Rusisë territoret e pushtuara, përfshirë Krimenë, ndërsa Moska kërkon të mbajë kontrollin. Vizita e sotme e Zelensky-t shihet si një përpjekje e fundit diplomatike për të forcuar qëndrimin europian përpara negociatave Trump–Putin.
