Presidenti i Ukrainës, Volodymyr Zelensky, ka deklaruar për herë të parë se është i gatshëm të zhvillojë zgjedhjet presidenciale, të cilat ishin planifikuar për vitin 2024, por u shtynë për shkak të luftës me Rusinë. Ai tha se nesër do të jetë në Ukrainë dhe pret propozimet për ndryshimet ligjore që do të mundësonin mbajtjen e zgjedhjeve gjatë gjendjes së jashtëzakonshme. Zelensky kërkoi që SHBA-ja dhe vendet evropiane të garantojnë sigurinë e procesit, duke theksuar se zgjedhjet mund të mbahen “brenda 60 deri në 90 ditësh” nëse siguria sigurohet.
Presioni për zgjedhje është rritur së fundmi edhe nga presidenti amerikan Donald Trump, i cili kritikoi faktin që Ukraina nuk ka zhvilluar zgjedhje për një periudhë të gjatë, duke vënë në dyshim standardet demokratike të vendit.
Ndërkohë, Zelensky po përballet me dobësim politik për shkak të një skandali korrupsioni që prek edhe bashkëpunëtorët e tij të afërt. Përveç deklaratave mbi zgjedhjet, ai bëri edhe një pranim të rrallë duke thënë se Ukraina aktualisht nuk ka fuqinë e nevojshme ushtarake dhe mbështetjen e mjaftueshme të aleatëve për të rimarrë Krimenë dhe territoret e tjera të pushtuara nga Rusia.
“Do të jem i sinqertë: sot nuk kemi forcën për të gjitha këto. Nuk kemi mbështetje të mjaftueshme,” u shpreh Zelensky.
