Grupi palestinez Hamas ka deklaruar se mbetet i përkushtuar ndaj marrëveshjes së armëpushimit me Izraelin dhe ka shprehur gatishmërinë për të kthyer trupat e të gjithë pengjeve izraelitë që ndodhen ende në Rripin e Gazës.
Sipas një deklarate të publikuar nga grupi, procesi i rikthimit të trupave mund të marrë kohë për shkak të kushteve në terren. “Disa prej trupave janë varrosur në tunele që janë shkatërruar nga ofensiva izraelite, ndërsa të tjerë ndodhen ende nën rrënojat e godinave të bombarduara dhe të shembura,” tha Hamasi.
Megjithëse ky angazhim shihet si një hap pozitiv drejt zbatimit të marrëveshjes, tensionet mes palëve vijojnë të mbeten të larta. Autoritetet izraelite kanë paralajmëruar se nëse Hamasi nuk e përmbush plotësisht detyrimin për kthimin e trupave, Izraeli do të rifillojë menjëherë operacionet ushtarake në Gaza.
Situata mbetet e brishtë, ndërsa komuniteti ndërkombëtar po bën thirrje për vetëpërmbajtje dhe zbatim të plotë të kushteve të armëpushimit.
