Të enjten në Angli u mbajtën zgjedhjet lokale. Rezultatet e konfirmuara deri flasin për një fitore të laburistëve dhe një humbje të thellë të konservatorëve që drejtohen nga kryeministri Rishi Sunak.
Deri tani konservatorët kanë humbur gati gjysmën e këshilltarëve lokalë por jo të gjithë kanë shkuar për labouristët. Liberal Demokratët dhe Partia e Gjelbër gjithashtu kanë përfituar nga humbjet e konservatorëve.
Pasi janë verifikuar, po numërohen sot votat e Bashkisë Londër që është edhe bashkia më e madhe në Angli. Rezultati pritet të jetë i ngushtë dhe nuk përjashtohen surprizat. Bashkia drejtohet prej dy mandateve nga laburisti Sadiq Khan. Politikat lokale jo popullore dhe lufta në Gaza kanë bërë që rezultati të jetë shumë i ngushtë për t’u parashikuar. Qëndrimi i laburistëve ndaj luftës në Gaza ka qenë shumë i ngjashëm me atë të konservatorëve në pushtet dhe kjo duket se mund t’i kushtojë Khan-it. Kujtojmë që Londra është një nga qytetet më kozmopolitane në Angli dhe vota e muslimanëve ka një peshë shumë të madhe. Nëse në dy zgjedhjet e shkuara Khan (i cili rrjedh nga një familje emigrantësh muslimane) e kishte të sigurt votën e muslimanëve, këtë vit asgjë nuk është e garantuar.
Vlen të përmendet që pjesëmarrja prej 32% ka qenë e ulët. Normalisht zgjedhjet parlamentare gjenerojnë më shumë interes dhe pjesëmarrja arrin në mbi 60%.
I vetmi lajm i mirë për kryeministrin Rishi Sunak është se Britania është vetëm pak muaj larg zgjedhjeve parlamentare dhe nuk duket sikur ka në partinë e tij oreks për të ndryshuar liderin për momentin. Kjo për dy arsye. E para, sepse nuk ka kohë të mjaftueshme për të riorganizuar partinë. Dhe e dyta, sepse askush nuk dëshiron të marrë drejtimin e një partie që po shkon drejt humbjes së sigurt.
