Një ngjarje e rëndë ka tronditur Malin e Zi pasditen e së hënës. Tre persona janë vrarë me armë zjarri në poligonin e qitjes “Češka zbrojevka”, pranë Danillovgradit, ndërsa autori i dyshuar është larguar i armatosur dhe vijon të jetë në kërkim.
Policia malazeze ka shpallur në kërkim Mihail Nikolaevič Shabunin, 30 vjeç, shtetas rus, i dyshuar për vrasjen e trefishtë. Ai kërkohet për veprën penale të “vrasjes së rëndë”.
Viktimat janë identifikuar si Nemanja Kapor, 20 vjeç, dhe Petar Globarević, 24 vjeç, të dy nga Podgorica, si dhe Momir Radonjić, 67 vjeç, nga Danillovgradi. Sipas raportimeve të mediave malazeze, të tre punonin në poligonin ku ndodhi krimi.
Një detaj i ri që po verifikohet nga hetuesit lidhet me mënyrën e arratisjes. Sipas gazetës malazeze “Vijesti”, policia po heton nëse Shabunin është larguar pas vrasjeve me një Seat Cordoba, automjet që rezulton në pronësi të babait të një prej viktimave.
Alarmi për ngjarjen është dhënë rreth orës 17:00, kur pronari i poligonit njoftoi policinë pasi në ambientet e tij u gjetën trupat e tre burrave.
Forcat speciale në kërkim të 30-vjeçarit
Përmasat e operacionit janë të mëdha. Në kërkimin e të dyshuarit janë angazhuar Njësia Speciale dhe njësitë e posaçme të Policisë së Malit të Zi, ndërsa janë vendosur bllokada në zona të ndryshme. Automjetet që lëvizin nga Danillovgradi drejt Podgoricës po ndalohen dhe kontrollohen nga policia.
Autoritetet kanë paralajmëruar se i dyshuari mund të jetë ende i armatosur dhe përbën rrezik. Për këtë arsye, qytetarëve në zonën e kërkimit u është bërë thirrje të qëndrojnë në banesa, të tregojnë kujdes ndaj personave të panjohur dhe të raportojnë çdo lëvizje të dyshimtë.
Policia u ka kërkuar qytetarëve që çdo informacion për vendndodhjen apo lëvizjet e Shabunin ta raportojnë në numrin 122 ose përmes aplikacionit “Policija CG”. Informacionet mund të jepen edhe në mënyrë anonime.
Motivi i vrasjes së trefishtë nuk është bërë ende publik. Hetimet vijojnë në koordinim me prokurorinë, ndërsa prioriteti i autoriteteve mbetet lokalizimi dhe arrestimi i 30-vjeçarit rus.
