Kreu i Prokurorisë së Posaçme Kundër Korrupsionit dhe Krimit të Organizuar (SPAK), Altin Dumani, prezantoi sot strategjinë për hetimin dhe parandalimin e krimeve elektorale, në një tryezë të organizuar nga shoqëria civile. Strategjia vjen në kuadër të zgjedhjeve parlamentare të 11 majit 2025 dhe synon të garantojë integritetin e procesit zgjedhor.
Gjatë fjalës së tij, Dumani theksoi se hetimet do të kryhen në përputhje me ligjin dhe pa ndikime politike. Ai nënvizoi se zgjatja e hetimeve pas zgjedhjeve krijon mosbesim tek publiku, ndaj SPAK ka reflektuar mbi këtë shqetësim duke miratuar një strategji të qartë dhe publike.
“Kemi bashkëpunim të mirë me zyrën e prokurorit të përgjithshëm për krimin zgjedhor dhe kemi përcaktuar mënyrën konkrete të trajtimit të rasteve sipas kompetencave. Strategjia jonë ka reflektuar shqetësimet e organizatave ndërkombëtare dhe të shoqërisë civile, duke përfshirë edhe masa konkrete për hetimin në kohë reale të krimeve zgjedhore,” deklaroi Dumani.
Strategjia e SPAK është publike dhe e aksesueshme nga kushdo, ndërsa synon të forcojë transparencën dhe besimin në procesin zgjedhor.
