Unioni i Sindikatave të Shqipërisë zhvilloi këtë të martë një protestë para Ministrisë së Ekonomisë, ku ngriti shqetësimet për kushtet e punës dhe nivelin e pagave në sektorin e shërbimeve publike.
Përfaqësuesit sindikalë kërkuan rritje pagash, përmirësim të kushteve të punës, shtim të numrit të të punësuarve dhe forcim të dialogut social e negociatave kolektive. Ata kërkuan gjithashtu mbrojtje më të fortë të të drejtave sindikale dhe ndalimin e privatizimit të shërbimeve publike.
Në kuadër të Ditës së Shërbimeve Publike të OKB-së, sindikatat e cilësuan situatën në vend si emergjente, duke paralajmëruar se mungesa e stafit dhe burimeve po ndikon drejtpërdrejt në cilësinë e shërbimeve dhe sigurinë e qytetarëve.
Gjatë protestës, përfaqësues të sindikatave deklaruan se sensibilizimi për shërbime publike më cilësore duhet të përfshijë të gjithë sektorët, nga arsimi deri te shëndetësia, ndërsa theksuan nevojën për më shumë investime dhe mbështetje për punonjësit.
Tubimit iu bashkuan edhe minatorë, të cilët ngritën shqetësime për pensionet e ulëta dhe vështirësitë ekonomike. Një pjesë e protestuesve shprehën kritika edhe ndaj klasës politike, duke kërkuar hapësirë më të madhe për përfshirjen e të rinjve në drejtimin e vendit.
Sindikatat paralajmëruan se në rast se kërkesat e tyre nuk do të merren parasysh, protestat dhe reagimet sindikale do të vijojnë edhe në ditët në vijim.
