Një ditë para se të njoftonte largimin e saj nga Operatori i Blerjeve të Përqendruara, Arlinda Pogaj, kishte menduar t’i bënte dhuratën e fundit me firmën e saj kompanisë “BIOMETRIC ALBANIA” të biznesmenit Artur Kadareja me një tender 207 milionë lekësh pa garë.
Bëhet fjalë për prcedurën me objekt “Blerja e kiteve dhe materialeve të konsumit për depistimin e HPV-së”, e thënë më thjesht, blerjen e pajisjeve dhe materiale që përdoren për të kontrolluar nëse një person ka virusin HPV për Institutin e Shëndetit Publik. Në këtë tender ka marrë pjesë vetëm subjekti “BIOMETRIC ALBANIA” me ofertën sa 96% të fondit limit. Duke mos pasur konkurrent tjetër në garë, institucioni i drejtuar nga Pogaj deri atë ditë, vendosi ta shpallte fitues.
Duket se Pogaj nuk mund ta linte detyrën pa i dhënë një tjetër “peshqesh” biznesmenit Artur Kadareja, kompania e të cilit ka qenë një nga të preferuarat e OPB gjatë drejtimit të saj. Kujtojmë këtu tenderin me vlerë 2 milionë euro për blerje proteza, kanjula dhe materiale të përgjithshme, ku Kadareja konkurronte me dy kompani që nuk paraqisnin ofertë dhe OPB e shpallte fitues.
Artur Kadareja është një nga përfituesit kryesor i fondeve të shëndetësisë gjatë 10 viteve të fundit. Përmes kompanisë Biometric Albania, i vetëm dhe në bashkëpunim ka marrë mbi 600 tendera me vlerë rreth 66 milionë euro. Vetëm gjatë pesë viteve të fundit në llogaritë e kompanisë Biometric Albania kanë kaluar rreth 39 milionë euro para publike, në zbatim të kontratave me Ministrinë e Shëndetësisë dhe degët e saj.
Nuk dihet nëse Pogaj e ka përfshirë edhe këtë tender në bilancin “e sukseseve” që kishte bërë në facebook kur njoftoi largimin. Por në statistika, “sukseset” e saj në OPB dalin pak ndryshe, sepse sipas Open Data nga 1,649 procedura prokurimi që mbajnë firmën e Pogajt, 959 janë me flamur të kuq. Pra mbi gjysmën e tyre janë identifikuar si tenderë me nivel risku.
