Situata e sigurisë në Kosovë, veçanërisht në pjesën veriore, mbetet e qetë por e brishtë. Gjatë periudhës së fundit të fushatës zgjedhore dhe dita e zgjedhjeve shihet si mundësi që të bëhen përpjekje për tensione.
Policia e Kosovës tashmë po zbaton masat e veçanta të parapara për këtë periudhë, ndërsa shtimet u bënë edhe në misionet ndërkombëtare si KFOR e EULEX.
Drizan Shala, ekspert i sigurisë, shprehet për A2: “Intesifikimi dhe shtimi i trupave ndërkombëtare nga ana e KFOR-it dhe EULEX-it është si rezultat i ndryshimeve që mund të priten dhe për të mos lejuar fare të eskalojë situata, shtimi i trupave nga faktori ndërkombëtar është masë preventive, por njëkohësisht edhe institucionet e Republikës së Kosovës, ato të sigurisë, kanë ndërmarrë veprimet adekuate preventive”.
Përpos tensionimit të situatës në terren, synimet e grupeve kriminale tentojnë që të paraqesin shtetin edhe jofunksional në procese të rëndësishme.
Refki Morina, nënkolonel policor në pension, deklaroi: “Dëshira e tyre është që këto procese të pengohen, të mos jenë demokratike dhe pengesat e tyre janë dhe do të jenë të vazhdueshme, por me punën dhe efikasitetin e Policisë së Kosovës, KFOR-it dhe EULEX-it dhe qytetarëve që jetojnë aty mendoj se do t’ia dalim që këto zgjedhje edhe në pjesën veriore dhe në tërë territorin e Kosovës të jenë zgjedhje demokratike”.
Menaxhimi i proceseve të rëndësishme, si ky i zgjedhjeve parlamentare, është kompleks në katër komunat me shumicë serbe në veri, por besojnë në mekanzimat e sigurisë që operojnë atje.
“Mendoj se ka vështirësi edhe atje, por nuk janë të pamundura të menaxhohen në tërësi pasi që në tërësi pjesa veriore mbulohet nga policia, nga KFOR-i, tani së fundmi kemi edhe trupa shtesë të KFOR-it italian”, tha Morina për A2.
Megjithatë, frika për tensione lidhet edhe me zhvillimet në Serbi, me Presidentin serb që do të tentojë të zhvendosë vëmendjen nga protestat e vazhdueshme të studentëve.
“Shtimi i trupave ndërkombëtare dhe atyre vendorë në pikat e ndryshme të territorit të Kosovës janë më shumë masë preventive të veprimeve të mundshme nga ana e grupeve të caktuara të Beogradit dhe asesi ndonjë element sa i përket përshkallëzimit të situatës së sigurisë së brendshme në Republikën e Kosovës”, theksoi Shala.
Qytetarët kosovarë me të drejtë vote do t’i drejtohen kutive të votimit më 9 shkurt, ndërsa fushata do të jetë deri me datë 8.
