Protesta e thirrur nga Opozita për në orën 19:00 ka aktivizuar Policinë e Shtetit, e cila ka vënë në gatishmëri mbi 800 forca të sigurisë. Të pranishëm do të jenë forcat e rendit, FNSH, Shqiponjat, ndërsa në rast nevoje, forcat RENEA janë gjithashtu në gatishmëri.
Për të garantuar rendin dhe sigurinë, të gjithë efektivët do të jenë të pajisur me maska kundragaz. Po ashtu, janë angazhuar 5 autobote me ujë, të cilat do të përdoren vetëm në raste incidentesh.
Një kordoni i forcave të policisë do të formohet para Kryeministrisë dhe në perimetrin përreth saj, siç parashikohet për çdo protestë. Agjentët civilë do të jenë gjithashtu në terren për të monitoruar zhvillimet e protestës. Dyert e Kryeministrisë do të jenë të blinduara me mbrojtje metalike, ndërsa përgjatë bulevardit ‘Dëshmorët e Kombit’ janë vendosur kamera me rezolucion të lartë për monitorimin e situatës.
