Ministria e Shëndetësisë e ka gjetur zgjidhjen “inovative” për mijëra problemet e Onkologjikut: nuk mungojnë ilaçet, nuk mungojnë shtretërit, nuk mungon as sistemi, thjesht mungon një video e bukur në Facebook për t’i mbuluar të gjitha.
Ndërsa pacientët vazhdojnë realisht të përballen me mungesë ilaçesh jetike dhe një shërbim që shpesh s’ka as minimumin e sigurisë së trajtimit, në versionin zyrtar gjithçka duket në nivel evropian, të paktën në postimet e ministrisë.
Sipas Ministrisë së Shëndetësisë, “Shërbimi Onkologjik i QSUNT-së është anëtarësuar në Organizatën Evropiane të Instituteve të Kancerit, duke shënuar një arritje të rëndësishme për zhvillimin e kujdesit onkologjik në vend”.
“Ky anëtarësim përforcon angazhimin për standarde europiane, rritje të cilësisë së shërbimeve dhe bashkëpunim me qendrat më të avancuara onkologjike në Europë, në funksion të një kujdesi më të mirë për pacientët”, thuhet në postimin e ministrisë.
Në facebook, ky anëtarësim shërben si certifikatë suksesi, në realitetin e përditshëm të pacientëve, pyetja mbetet e njëjtë, sa vlejnë standardet europiane kur mungojnë ilaçet bazë?
