Tenori me famë botërore nga Kosova, Ramë Lahaj, i cili më 20 qershor do të mbajë koncertin e radhës në Shirokë të Shkodrës, ka sjellë jo vetëm emocion përmes artit të tij, por edhe një moment të thellë reflektimi njerëzor gjatë qëndrimit në qytet.
Ditët e kaluara në Shkodër janë shoqëruar me një gjest të veçantë nga artisti shqiptar, i cili ka vizituar varrezat katolike të Rrmajit, duke nderuar kujtimin e një gruaje shkodrane me të cilën e lidh një histori personale dhe tejet prekëse.
Ramë Lahaj ka kujtuar me mirënjohje një grua nga Shkodra, e cila për disa vite kishte shërbyer me përkushtim pranë nënës së tij të sëmurë. Në një periudhë të vështirë për familjen e tij, kur emigrimi i fëmijëve e kishte lënë atë vetëm, kjo grua kishte qenë pranë saj, duke i ofruar kujdes dhe mbështetje të çmuar.
Me ndjenjë të thellë respekti, tenori thekson se nuk do ta harrojë kurrë këtë kontribut njerëzor në një nga momentet më të vështira të jetës së familjes së tij. Emri i saj, të cilin familja ka zgjedhur ta mbajë privat, mbetet për të një simbol i mirënjohjes së përjetshme dhe i humanizmit të pastër që nuk harrohet me kohën.
