Rikthimi i Princit Harry dhe Meghan Markle në Britaninë e Madhe nuk do të shoqërohet me rikthimin e tyre në detyrat mbretërore.
Mbreti Charles u ka dërguar një direktivë zyrtarëve të lartë të qeverisë, Forcave të Armatosura dhe përfaqësuesve të Kurorës, duke sqaruar se Duka dhe Dukesha e Sussex-it vijojnë të konsiderohen persona privatë.
Në dokument theksohet se statusi i çiftit nuk ka ndryshuar që prej vitit 2020, kur ata u tërhoqën nga rolet si anëtarë aktivë të familjes mbretërore. Harry dhe Meghan nuk përfaqësojnë Kurorën, nuk kryejnë detyra zyrtare dhe aktivitetet e tyre bamirëse apo tregtare mbeten private.
Edhe përdorimi i titujve “His Royal Highness” dhe “Her Royal Highness” vijon të jetë i pezulluar. Çështjet që lidhen me sigurinë e tyre do të trajtohen nga autoritetet përkatëse, ndërsa çdo kërkesë që mund të përfshijë fonde publike duhet t’i drejtohet Pallatit Buckingham.
Direktiva vjen pas rikthimit të Harry-t dhe Meghan-it në Britani së bashku me dy fëmijët e tyre, Archie dhe Lilibet. Lëvizja nxiti spekulime për një rikthim të mundshëm të çiftit në jetën mbretërore, por Pallati ka bërë të qartë se marrëveshja e arritur pas largimit të tyre mbetet në fuqi.
Harry dhe Meghan mund të vijojnë jetën dhe angazhimet e tyre në Britani, por pa përfaqësuar familjen mbretërore dhe pa marrë përsipër funksione zyrtare.
