Në Shëngjin kanë mbërritur forca policore italiane, mjekë dhe psikologë, që do të merren me trajtimin dhe menaxhimin e emigrantëve të mbërritur. Masat e sigurisë janë rritur për të parandaluar largimin e tyre nga kampi, i cili është i pajisur me kamera vëzhgimi dhe një gardh rrethues. Ambientet përfshijnë gjithashtu zyra për marrjen në pyetje të refugjatëve, ndërsa menaxhimi i kampit do të bëhet nga policia italiane.
Pas përfundimit të procedurave në Shëngjin, emigrantët do të transferohen në Gjadër. Në Gjadër është ngritur një qendër për ndalimin e azilkërkuesve me kapacitet prej 880 vendesh, një CPR me 144 vende dhe një burg me 20 vende. Këto qendra janë tashmë gati dhe kanë kaluar testimin e nevojshëm më 9 tetor.
Marrëveshja ndërmjet Shqipërisë dhe Italisë përfshin koordinimin e këtyre kampeve për të përballuar fluksin e azilkërkuesve që vijnë përmes detit.
