Nënkryetari i Komunitetit Mysliman të Shqipërisë, Taulant Bica në një intervistë për Top News shpjegoi arsyet përse nuk morën pjesë në ceremoninë e inaugurimit të xhamisë së Namazgjasë në Tiranë.
Bica tha se morën ftesë, por Kryesia e KMSH-së vendosi që të përfaqësohej vetëm nga myftiu i Tiranës. Sipas tij, ka politika që komuniteti i gjykon që të përfaqësohen në rang të dytë apo të tretë.
“Ishte një finalizim dhe kurorëzim i ditës së sotme. Ftesa që komuniteti mysliman shqiptar të vinte duhej të ishte nga shteti shqiptar dhe ashtu ndodhi. Patjetër erdhi. KMSH u ftua nga pala e drejtuesve shqiptarë. Sipas vendimit që kryesia mori duke vlerësuar ftesën e cila erdhi është gjykuiar që të jetë prezent Myftiu i Tiranës, është më e natyrshme dhe më e pritura që përfaqësuesi numër 1 i një institucioni duhet të jetë prezent në inaugurime kaq të rëndësishme siç ishte kjo, por ka politika që komuniteti i gjykon që të përfaqësohen në rang të dytë apo të tretë” – u shpreh nënkryetari i KMSH, Taulant Bica.
Xhamia e Namazgjasë pas shumë përplasjeve në distancë mes erdoganistëve dhe gylenistëve në Shqipëri,u hap ditën e sotme në një ceremoni ku morën pjesë kryeministri Edi Rama, presidenti i Turqisë, Rexhep Tayyip Erdogan. Xhamia do të menaxhohet nga myftiu i Tiranës, Gazment Teqja, i cili përfaqësoi në ceremoni KMSH-n.
