Gjykata e Posaçme ka vendosur të kthejë për plotësim hetimesh dosjen ndaj deputetit demokrat Asllan Dogjani, i akuzuar nga SPAK për “deklarim të rremë të pasurisë”.
Vendimi u mor nga gjyqtarja Rudina Palloj, e cila gjatë shqyrtimit paraprak të kërkesës së Prokurorisë së Posaçme për kalimin e çështjes për gjykim, konstatoi mangësi në hetime. Gjykata i ka lënë SPAK dy muaj kohë për të përmbushur disa detyra konkrete hetimore.
Sipas SPAK, deputeti Dogjani ka dhënë deklarime të pavërteta për mënyrën se si ka përfituar një apartament me vlerë 121,980 euro. Dogjani ka pretenduar se apartamenti është përfituar në këmbim të konsultave juridike, por hetimet kanë zbuluar se ai është blerë me para në dorë (cash).
SPAK ka detyrën të plotësojë hetimet mbi burimin e të ardhurave të deputetit dhe rrethanat e sakta të përfitimit të pasurisë, përpara se çështja të rikthehet në Gjykatën e Posaçme.
