Londra bëhet sonte qendra e vëmendjes së futbollit botëror, pasi do të zhvillohet ceremonia e ndarjes së çmimeve “Topi i Artë 2026”. Harry Kane, Lamine Yamal dhe Kylian Mbappe përmenden ndër favoritët kryesorë për çmimin individual më prestigjioz në futboll, ndërsa Lionel Messi tërheq vëmendjen për statistikat dhe vlerësimet e tij të larta.
Lamine Yamal vjen pas një sezoni të suksesshëm me Barcelonën dhe kombëtaren e Spanjës. Sipas statistikave të publikuara, në 57 paraqitje ai ka shënuar 25 gola dhe ka dhënë 20 asistime, duke marrë një vlerësim mesatar prej 7.83 nga SofaScore.
Në garë është edhe sulmuesi anglez Harry Kane, i cili ka pasur një sezon të jashtëzakonshëm me Bayern Munichun. Ai regjistroi 73 gola dhe tetë asistime në 65 paraqitje, ndërsa vlerësimi i tij mesatar nga SofaScore ishte 7.79.
Kylian Mbappe është një tjetër kandidat i rëndësishëm. Edhe pse nuk arriti të fitojë trofe me Real Madridin apo Francën, sulmuesi francez spikati me statistikat individuale. Në 60 paraqitje, ai shënoi 58 gola dhe regjistroi 13 asistime, me një vlerësim mesatar prej 7.74 nga SofaScore.
Megjithatë, vlerësimin më të lartë mes emrave të përmendur e ka Lionel Messi. Ylli argjentinas, që aktivizohet me Inter Miamin, regjistroi 45 gola dhe 30 asistime në 49 paraqitje, duke marrë notën mesatare 8.85 nga SofaScore.
Ceremonia e këtij viti zhvillohet në Londër dhe shënon edicionin e 70-të të çmimit “Topi i Artë”. Fituesi do të përcaktohet nga votat e gazetarëve të përzgjedhur, të cilët vlerësojnë paraqitjet individuale, kontributin në sukseset e skuadrave dhe sjelljen sportive. Deri në shpalljen zyrtare, favoritët mbeten në pritje të vendimit përfundimtar.
