Kur një qytetar 28-vjeçar mbetet i gjymtuar në trupin e tij, duke humbur shikimin e syrit të majtë nga një plumb gome i lëshuar drejtpërdrejt nga forcat e rendit, çdo qeveri me standarde demokratike do të duhej të jepte llogari, të kërkonte ndjesë publike dhe të pranonte përgjegjësinë institucionale.
Por jo në Shqipërinë e Edi Ramës.
Në vend që të skuqet nga turpi për dhunën e tejskajshme policore ndaj protestuesve, kreu i qeverisë ka zgjedhur të bëjë atë që di më mirë: të sillet si analist i rrjeteve sociale, të shpërndajë etiketime fyese me klauna e demonë, dhe mbi të gjitha, të shfrytëzojë fatkeqësinë e një të riu për të bërë propagandë politike.
Përplasjet e fundit në protestë lanë pas një dramë të rëndë njerëzore për 28-vjeçarin Erjon Vishkulli.
I riu u godit barbarisht nga një plumb gome në sy, ndërsa ndërhyrjet kirurgjikale kanë qenë një kalvar i vërtetë për shkak të hemorragjisë dhe faktit se predha ka mbetur në kokë/sy, duke rrezikuar përgjithmonë dritën e syrit të tij.
Përballë kësaj pamjeje rrëqethëse, ku shteti që duhet të mbrojë qytetarët kthehet në qomor, reagimi i kryeministrit ngjan me një fyerje kolektive ndaj çdo shqiptari.
Në vend të pendimit, Rama kërkon duartrokitje se u kujtua të siguronte një avion charter për kurimin e të riut në Itali:
"Pasi jam marrë personalisht që mbrëmë me sigurimin e kurimit të djalit në spitalin më të mirë të Italisë, si edhe të transportit me një avion charter mjekësor..."
Kjo qasje prej "sundimtari bujar" që i fal shëndetin e dëmtuar nga plumbat e vetë shtetit të tij është cinizmi në kubik.
Ai fshin me një të rënë të kalemit faktin se arma që i mori dritën e syrit Erjon Vishkullit i përket një institucioni që varet direkt nga ekzekutivi.
Përgjegjësia shtetërore zhduket, për t'i lënë vendin retorikës boshe dhe gjuhës së urrejtjes.
Pa u skuqur aspak se policia e tij ka gjymtuar një djalë 28-vjeçar, Rama lëshon fajin te të tjerët, duke përdorur citimet e tij tashmë të zakonshme plot helm e përçmim:
"Ju jeni errësira që i mbylli atij djali dritën e syrit! Ju jeni gishtat dhe thonjtë e dorës së malkimit që e përndjek Shqipërinë qysh në 1912-ën..."
Ky është spektakli i papërgjegjshmërisë qeverisëse.
