Në Dhomat e Specializuara në Hagë, katër ish-krerët e UÇK-së – Hashim Thaçi, Kadri Veseli, Rexhep Selimi dhe Jakup Krasniqi – mbajtën fjalët e tyre përfundimtare, duke deklaruar njëzëri pafajësinë dhe duke kundërshtuar kërkesën e Prokurorisë për dënim me nga 45 vite burg për secilin.
I pari që mori fjalën ishte ish-presidenti Thaçi, i cili tha se është i pafajshëm dhe se gjatë luftës ka vepruar për mbrojtjen e popullit të Kosovës. Ai e cilësoi si të pavërtetë dhe ofenduese pretendimin e Prokurorisë se synimi i tij ishte marrja e kontrollit të vendit, duke theksuar se kontrolli në atë kohë ishte në duart e regjimit të Sllobodan Millosheviç. Thaçi shtoi se bashkëpunimi me NATO dhe aleatët perëndimorë ishte i domosdoshëm për përfundimin e luftës dhe arritjen e lirisë.
Rexhep Selimi deklaroi se UÇK-ja kishte për qëllim çlirimin e vendit dhe jo sulme ndaj civilëve apo kundërshtarëve politikë. Ai tha se shumë luftëtarë kanë humbur jetën duke siguruar armë për mbrojtjen e Kosovës dhe e konsideroi nder cilësimin si bashkëluftëtar i Adem Jashari. Selimi e cilësoi kërkesën për dënime të rënda si përpjekje për t’ua pamundësuar kthimin në Kosovë.
Edhe avokatët mbrojtës kundërshtuan akuzat, duke argumentuar se barra e provës bie mbi Prokurorinë dhe se provat e paraqitura janë të pamjaftueshme ose të pabazuara. Mbrojtja kërkoi shpalljen e pafajësisë për të katër të akuzuarit.
Procesi gjyqësor vijon me pritjen e vendimit nga trupi gjykues.
