Kryeministri në detyrë, Albin Kurti, dhe kryetari i Lidhjes Demokratike të Kosovës, Lumir Abdixhiku, kanë përfunduar takimin e zhvilluar pas dështimit për të siguruar mbështetjen e plotë për kandidatin për president, Bekim Sejdiu.
Pas përfundimit të takimit, Kurti është larguar nga Kuvendi pa dhënë deklaratë për mediat. Ai ka vijuar më pas takimet me përfaqësuesit e minoriteteve joserbe.
Ndryshe nga Kurti, Abdixhiku foli shkurt para gazetarëve, duke e cilësuar takimin si një komunikim të rregullt mes palëve pas zhvillimeve të fundit.
“Ishte një njoftim i rregullt pas zhvillimeve të fundit. Kemi njoftuar zyrtarisht njëri-tjetrin për zhvillimet në parti, siç është në rregullore”, deklaroi ai.
I pyetur për hapat e mëtejshëm, kreu i LDK-së tha se situata aktuale politike dhe numrat në Kuvend e bëjnë të vështirë gjetjen e një zgjidhjeje.
“Për hapin e radhës duhet të pyesni ata që po duan ta çojnë Kosovën në një fazë të paqartë. Gjendja numerike në Kuvend është kjo që është”, u shpreh Abdixhiku.
Ai shtoi se është përpjekur të gjejë një zgjidhje, por sipas tij, distancimi i partive të tjera po e çon vendin drejt zgjedhjeve të reja.
“Çdo parti është e mirëseardhur të ndihmojë në këtë situatë. Ne jemi në një situatë të pamundur numerike për të zgjedhur presidentin e ri”, përfundoi Abdixhiku.
