Ish-komandanti ushtarak i serbëve të Bosnjës, Ratko Mlladiç, do të varroset me nderime shtetërore dhe ushtarake, bëri të ditur ministri serb i Drejtësisë, Nenad Vujiç, në një deklaratë për radiostacionin K1.
Mlladiç, i njohur si “Kasapi i Bosnjës” për rolin e tij gjatë luftës në Bosnje dhe veçanërisht në masakrën e Srebrenicës, vdiq të enjten në Hagë, ku po vuante dënimin me burgim të përjetshëm për gjenocid, krime lufte dhe krime kundër njerëzimit.
“Është e sigurt se gjenerali Mlladiç do të marrë të gjitha nderimet ushtarake dhe shtetërore që meriton”, deklaroi Vujiç.
Autoritetet serbe janë në pritje të informacioneve nga Haga lidhur me procedurat për kthimin e trupit. Sipas ministrit, Serbia është e gatshme të dërgojë përfaqësuesit e saj sapo të përcaktohen hapat e mëtejshëm.
Vdekja e Mlladiçit vjen pas disa muajsh të përkeqësimit të gjendjes së tij shëndetësore. Vetëm pak ditë më parë ishte refuzuar një kërkesë e familjes dhe e qeverisë serbe për transferimin e tij në një spital ushtarak në Beograd.
Rreth 8 mijë boshnjakë u vranë në Srebrenicë
Ratko Mlladiç ishte një nga figurat kryesore të luftës në Bosnje dhe Hercegovinë, krahas ish-presidentit jugosllav Slobodan Millosheviç dhe ish-liderit politik të serbëve të Bosnjës, Radovan Karaxhiç.
Lufta e viteve 1992-1995 la rreth 100 mijë të vrarë dhe detyroi rreth 2.2 milionë njerëz të largoheshin nga shtëpitë e tyre.
Në korrik të vitit 1995, forcat serbe të Bosnjës, nën komandën e Mlladiçit, vranë rreth 8 mijë burra dhe djem boshnjakë në Srebrenicë. Masakra është cilësuar gjenocid nga gjykatat ndërkombëtare dhe konsiderohet një nga krimet më të rënda të kryera në Evropë që nga Lufta e Dytë Botërore.
Nderimet shtetërore shkaktojnë reagime
Vendimi për varrosjen e Mlladiçit me nderime shtetërore dhe ushtarake ka shkaktuar reagime të forta në rajon.
Ministri kroat i Mbrojtjes, Ivan Anushiç, shprehu shqetësim lidhur me riarmatimin e Serbisë, duke iu referuar edhe përvojës së konflikteve të viteve ’90.
Edhe në Serbi, figura të opozitës kanë kundërshtuar nderimet për ish-komandantin, duke theksuar se vdekja e tij nuk ndryshon vendimet e gjykatave ndërkombëtare dhe përgjegjësinë e përcaktuar për krimet e kryera gjatë luftës.
Nga Rusia, ndërkohë, ka ardhur një reagim në mbështetje të Mlladiçit. Sergei Shoigu dënoi dënimin dhe kushtet e burgimit të ish-gjeneralit serb të Bosnjës, ndërsa shprehu ngushëllime për familjen e tij.
