Në Mbretërinë e Bashkuar po rriten shqetësimet për rikthimin e trendit të “super skinny”, pasi disa reklama të markave të njohura të modës janë ndaluar për përdorimin e modeleve që “duken tepër të holla në mënyrë të pashëndetshme”. Ky stil, i njohur si “heroin chic”, u bë i famshëm në vitet 1990 dhe fillim të 2000-ës, por më pas u zëvendësua nga lëvizja e “body positivity” që promovonte trupat me forma natyrale.
Marka si Zara, Next dhe Marks & Spencer kanë pasur reklama të ndaluara muajt e fundit, ndërsa Autoriteti i Standardeve të Reklamimit (ASA) ka regjistruar një rritje të dukshme të ankesave. Në korrik, pas ndalimit të një reklame të M&S, numri i ankesave u katërfishua. Megjithëse ASA nuk ka shpallur asnjë model si jo të shëndetshëm, është theksuar se pozat, ndriçimi dhe stili i flokëve kanë kontribuar në dukjen më të hollë të modeleve.
Aktivistja dhe modelja Charli Howard paralajmëron se jemi “në prag të rikthimit të heroin chic”, ndërsa ish-Miss Anglia Charlotte Holmes beson se standardi “ultra-thin” kurrë nuk është zhdukur plotësisht. Kritikët shprehin frikën se pas përparimit të lëvizjes për pozitivitet trupor, moda mund të kthehet sërish drejt idealeve të dëmshme që nxisin imazhe jo realiste të trupit.
