Denis Meçe, i akuzuar për vrasjen e Egli Progës në Pogradec, është arrestuar nga policia pasi dyshohet se ka shkelur masën e sigurisë “arrest në shtëpi”, të vendosur më herët ndaj tij.
Sipas informacioneve, policia kishte siguruar të dhëna se Meçe kishte dalë nga banesa në kundërshtim me vendimin e gjykatës. Pas marrjes së këtyre informacioneve, efektivët organizuan një operacion për lokalizimin dhe arrestimin e tij.
Gjatë ndërhyrjes, Meçe është konstatuar rreth 300 metra larg banesës së tij, ndërsa po kthehej në shtëpi. Në momentin kur efektivët kanë tentuar ta ndalojnë, ai dyshohet se ka kundërshtuar një punonjës policie, duke e goditur me shuplakë dhe duke tentuar të largohej për t’i shpëtuar arrestimit.
Pavarësisht rezistencës së dyshuar, efektivët kanë arritur ta neutralizojnë dhe ta vënë në pranga.
Denis Meçe është i pandehuri kryesor në procesin gjyqësor për vrasjen e Egli Progës, ngjarje e rëndë e ndodhur në Pogradec, e cila shkaktoi reagime të shumta në opinionin publik.
Pas arrestimit, pritet që autoritetet të kryejnë veprimet e mëtejshme procedurale, ndërsa shkelja e masës së sigurisë dhe kundërshtimi i dyshuar i punonjësit të policisë mund të sjellin pasoja të tjera ligjore për të akuzuarin.
