Ekspertët e Mjekësisë Ligjore kanë dalë në përfundimin se plagët që pësoi Klea Prenga nga dhuna që ushtruan ndaj saj motrat Antonela dhe Mariela Berisha hyjnë në kategorinë e shëmtimit që konsiderohet si plagosje e rëndë. Fillimisht ekspertët e IML në aktin e parë nuk arrinin në një konkluzion të qartë, por në aktin e dytë shprehen se ndaj Prengës janë ndërmarrë veprime aktive shoqërisht të rrezikshme dhe si pasojë e këtyre veprimeve, Prengës i është shkaktuar shëmtim në fytyrën e saj.
Aktualisht motrat Berisha janë në kërkim me urdhër të prokurorit, por me përfundimet e ekspertëve pritet që ndaj tyre të kërkohet masë sigurie në gjykatë.
Ndaj tyre rëndon akuza e plagosjes së rëndë me dashje, përforcuar kjo dhe nga konkluzionet e mjekëve ligjorë. Antonela e Mariela Berisha e goditën Prengën teksa ajo ndodhej në një lokal luksoz në Tiranë. Vajzat e showbizit u përplasën për motive të dobëta. Dy motrat janë në kërkim dhe mendohet se që pas ngjarjes janë larguar jashtë vendit.
Plagosja e kryer me dashje që ka sjellë si pasojë gjymtimin, shëmtimin ose çdo dëmtim tjetër të përhershëm të shëndetit, ndërprerjen e shtatzanisë, dënohet me burgim nga tre gjer në dhjetë vjet. Megjithatë mbetet për t’u parë në rastin konkret sesi do t’i trajtojë drejtësia motrat Berisha. Ndërkohë që Prenga të mos ketë shenjën në fytyrën e saj duhet t’i drejtohet kirurgjisë plastike.
