Gjykata e Tiranës dënoi me 8 muaj shërbim prove një 31-vjeçar për akuzën e përndjekjes së gjyqtarit të Kukësit, Aulon Pashaj.
A.B., u dënua fillimisht me 4 muaj burg, që u konvertua me shërbim prove.
31-vjecari u kallëzua nga gjyqtari Pashaj, i cili pretendonte se A.B e kërcënonte e shqetësonte pa arsye, më mënyrë të përsëritur.
Ai ka shpjeguar se A.B e ka kërcënuar me fjalët “spiun, lepur, etj”. Episodi i parë sipas gjyqtarit ka ndodhur në 2020 dhe më i fundit në 2023, kur ai po ecte në këmbë dhe A.B i është drejtuar me fjalët “ruaju ruaju prokuror”.
Gjyqtari pretendon se kjo situatë është bërë shqetësuese për të dhe familjen e tij, ndaj ka kërkuar hetimin e rastit.
I pandehuri iu tha hetuesve se nuk ka asnjë konflikt me gjyqtarin dhe se ka qenë i dehur dhe nuk mban mend veprimet e tij, megjithatë gjykata ka vendosur ta dënojë. Ai këmbëngul se nuk ka kryer më veprime që mund të shqetësojnë gjyqtarin e aq më pak të vënë në rrezik jetën e njeriut të drejtësisë. I pandehuri A.B ka deklaruar se do t’i drejtohet Gjykatës së Apelit, pasi sic argumenton dënimi për të është i padrejtë.
