Gjykata e Posaçme Kundër Korrupsionit dhe Krimit të Organizuar ka shpallur fajtor ish-oficerin e policisë gjyqësore Igli Haxhiaj, i akuzuar për veprat penale “Shpërdorim detyre”, “Zbulim i akteve ose të dhënave sekrete” dhe “Korrupsion pasiv i gjyqtarëve, prokurorëve dhe funksionarëve të tjerë të organeve të drejtësisë”, pasi dyshohet se dekonspiroi hetimet ndaj grupit të Elvis Doçit, i njohur si Visi i Pojës.
Sipas vendimit të GJKKO-së, Haxhiaj u dënua fillimisht me 4 vite burg, por për shkak të gjykimit të shkurtuar dënimi iu ul në 2 vite e 8 muaj burgim.
Gjykata vendosi që vuajtja e dënimit të llogaritet nga data 27 nëntor 2025, ndërsa ai do ta kryejë dënimin në një institucion të sigurisë së zakonshme. Po ashtu, Haxhiajt i është hequr e drejta për të ushtruar funksione publike për një periudhë 5-vjeçare.
Vendimi u dha nga trupi gjykues i GJKKO-së, ndërsa shpenzimet procedurale iu ngarkuan të pandehurit.
Sipas hetimeve të SPAK, pas zbërthimit të komunikimeve në aplikacionin SkyECC, u administruan biseda mes Igli Haxhiajt dhe Denis Myftiut, i akuzuar si pjesë e grupit kriminal të Elvis Doçit. Në këto komunikime flitej për dhënien e informacioneve sekrete kundrejt pagesave që, sipas hetimeve, varionin nga 5 mijë deri në 15 mijë euro.
Hetimet ngritën dyshime se ish-oficeri dekonspironte aksionet policore dhe informacionet hetimore në favor të grupit kriminal të Elvis Doçit, i njohur si Visi i Pojës.
