Gjykata e Posaçme kundër Korrupsionit dhe Krimit të Organizuar ka vendosur lirimin nga burgu të Ermal Kurtulajt, një prej të pandehurve në dosjen “SASPAC”, duke i zëvendësuar masën e sigurisë me “arrest në shtëpi”.
Vendimi u mor pasi kanë përfunduar afatet ligjore të paraburgimit. Kërkesa për lirimin e Kurtulajt ishte depozituar nga mbrojtja e tij, e cila argumentoi se afatet maksimale të paraburgimit kishin skaduar, duke iu referuar një vendimi njësues të Gjykatës së Lartë që përcakton kufijtë kohorë të masave të sigurisë.
Vendimi i GJKKO-së vjen vetëm pak ditë pasi e njëjta gjykatë ktheu për plotësim hetimesh në SPAK dosjen “SASPAC”, ku të pandehur janë ish-ministri Ilir Beqaj dhe persona të tjerë. Gjykata i ka lënë afat SPAK-ut deri më 30 tetor për kryerjen e veprimeve shtesë hetimore.
Aktualisht, Ilir Beqaj dhe Ermal Kurtulaj janë të vetmit të arrestuar mes nëntë të pandehurve të dosjes, ndërsa në hetim janë edhe dy shoqëri tregtare.
Dosja e Agjencisë Shtetërore për Programimin Strategjik dhe Koordinimin e Ndihmës (SASPAC) qëndroi për rreth një vit në fazën e gjykimit paraprak dhe me dyer të mbyllura. Në përfundim të kësaj faze, GJKKO vendosi të mos e kalojë çështjen për gjykim në themel, por ta kthejë në SPAK për hetime të mëtejshme, duke përcaktuar detyra konkrete hetimore dhe afatin deri më 30 tetor për përfundimin e tyre.
Edhe Ilir Beqaj, nëpërmjet mbrojtjes së tij, ka kërkuar shfuqizimin e masës së sigurisë "arrest në burg", ndërsa pritet që gjykata të shqyrtojë kërkesën në vijim.
