Kryetari i PD, Sali Berisha, ka ndryshuar sërish qëndrim në lidhje me SPAK. Pas deklaratave të mëparshme ku premtonte shkrirjen e Prokurorisë së Posaçme, Berisha në emisionin “Zonë e Lirë” mbrëmjen e sotme tha se nuk e ka pasur ndërrmend asgjësimin e saj. Ai më tej tha se prokuroria duhet të vendoset në kontroll institucional.
“Nuk kam pasur kurrë ndërmend asgjësimin e një institucioni të rëndësishëm akuze. Por prokuroria politike është prokurori diktature.
Kjo prokurori nuk ka kontroll. Askush nuk e kontrollon. Unë e kam fjalën për kontroll institucional. Janë disa gjëra që kjo reformë kërkoi ndërhyrje emergjente. Shmanget karakteri politik i prokurorisë” - tha Berisha.
Qëndrimi i ri i kreut të PD ndaj SPAK, është pothuajse i njëjtë me natyrën e Komisionit Xhafaj, i cili një nga qëllimet që ka është dhe monitorimi i institucioneve të drejtësisë së re.
Këtë komision përveç se e kanë refuzuar institucionet e drejtësisë dhe paralajmërimeve të ndërkombëtarëve për ruajtjen e pavarësisë së SPAK dhe GJKKO, deri më tani është refuzuar edhe nga Sali Berisha. Por mesa duket, refuzimi qenka vetëm për mospjesëmarrje fizike, pasi qasjet ndaj drejtësisë pothuajse i kanë të njëjtë.
