Policia e Tiranës ka finalizuar operacionin e koduar “Midnight”, që synonte goditjen e veprimtarive të paligjshme në fushën e armëmbajtjes pa leje dhe shpërndarjes së lëndëve narkotike.
Gjatë operacionit u arrestuan në flagrancë shtetasit R.Z., 37 vjeç, për veprat penale “Armëmbajtja pa leje” dhe “Prodhimi dhe shitja e narkotikëve”, si dhe babai i tij, B.Z., 65 vjeç, për veprën penale “Veprime që pengojnë zbulimin e së vërtetës”.
Në rrugën “Niko Avramo”, policia ndaloi automjetin e drejtuar nga R.Z., ku u gjet një sasi lënde narkotike e dyshuar kokainë. Në vijim të kontrollit në banesën e tij, u sekuestruan një armë zjarri pistoletë, municion luftarak dhe rreth 36 gramë kokainë, e ndarë në doza, gati për shitje.
Gjatë ndërhyrjes, babai i 37-vjeçarit tentoi të fshehë provat duke hedhur lëndën narkotike në lavaman dhe armën nga ballkoni, por u kap në flagrancë nga policia.
Materialet për këtë çështje i janë dërguar Prokurorisë për veprime të mëtejshme procedurale.
