Teksa la ambjentet e SPAK gazetari Artan Hoxha tha se urdhëri për vrasjen e 4 qytetarëve gjatë demostratës së 21 janarit të 2011 është dhënë me gjakftohtësi. Ai e bëri këtë deklaratë pasi dorëzoi në prokurori një audio.
"Prokuroria do të vlerësojë sa i vlefshëm është ai audioregjistrim. Jo vetëm ka qenë me urdhër, por urdhër ka ardhur më lart me gjakftohtësi më të madhe, ashtu sikurse erdhi dhe urdhri për të ndaluar. Nëse zjarri do të zgjaste sikur 30 sekonda më shumë, aty do të ishte bërë masakër shumë më e madhe se sa u bë”, deklaroi Hoxha.
Sipas tij SPAK ka mundësinë të zbardhë vrasjet e 21 janarit.
"Nëse nuk zbardhet as këtë radhë, nuk ka për t’u zbardhur më. Provat u prishën që në momentin që ndodhi ngjarja. SPAK tani është më ndryshe, e ka ma të lehtë të thërrasë zyrtarë të lartë" tha Hoxha. SPAK po heton per të identifikuar urdhëruesit e vrasjeve me 21 janar. Në bulevardin Dëshmorët e Kombit gjatë demostratës së opozitës qe drejtohej atëkohë nga Edi Rama u vranë Faik Myrtaj, Hekuran Deda, Ziver Veizi e Aleks Nika.
