Ambasada e Shteteve të Bashkuara në Tiranë njoftoi përmes një postimi në rrjetet sociale se përfaqësues të saj janë takuar së fundmi me anëtarë të sapozgjedhur të Kuvendit të Shqipërisë, në prag të fillimit të legjislaturës së re.
Sipas ambasadës, këto takime kishin për qëllim të kuptonin më mirë shqetësimet dhe prioritetet e komuniteteve që secili deputet përfaqëson.
“Ne presim me kënaqësi të punojmë me përfaqësues të zgjedhur nga i gjithë spektri politik për të vijuar partneritetin tonë të ngushtë me Shqipërinë,” shkruhet në postim.
Në fotot e publikuara nga ambasada amerikane shfaqen deputetë të rinj, ku nga PD ishin çuar Besart Xhaferri dhe Igli Cara, të cilët siguruan mandatin nga lista e mbyllur. Në fakt, të dy demokratët nuk janë të rinj as në moshë dhe as në politikë, çka reflekton mangësitë e PD me emra të rinj.
Ndërsa socialistët kishin çuar si përfaqësuese vetëm Ilva Gjuzin, deputeten e cila siguroi mandatin dhe karrierën në PS pas lavdeve që i thurri kryeministrit Rama.
Me gjasë, pushimet e gushtit kanë lënë jashtë këtij takimi edhe dy deputetet e reja më të spikatura të PS, Zegjine Çaushin dhe Sara Milen. Por shtatori nuk është larg, dhe talentet e reja të partive politike do të kenë mundësinë të shfaqin aftësitë e tyre në politikë.
