Një tjetër largim shënohet në radhët drejtuese të Bashkisë së Tiranës. Eldi Hoxha ka dhënë dorëheqjen nga posti i sekretarit të Përgjithshëm të institucionit.
Hoxha largohet kështu nga një prej posteve kyçe të administratës së kryeqytetit, ndërsa deri më tani nuk janë bërë të ditura arsyet e dorëheqjes së tij.
Largimi i tij vjen vetëm një ditë pas dorëheqjes së Anuela Ristanit nga posti i nënkryetares së Bashkisë së Tiranës, duke shënuar kështu një tjetër lëvizje në nivelet e larta drejtuese të institucionit.
Ristani vendosi të largohej pasi kryebashkiaku Erion Veliaj i revokoi kompetencat e deleguara për drejtimin e Bashkisë, të cilat ia kishte kaluar në shkurt të vitit 2025, pas arrestimit të tij.
Në vendimin për të rimarrë kompetencat, Veliaj argumentonte se delegimi kishte qenë një masë e përkohshme për garantimin e funksionimit të institucionit. Në dokument ngriheshin gjithashtu pretendime për mungesë koordinimi dhe moszbatim të disa urdhrave të kryebashkiakut.
Vetëm pak ditë pas kësaj lëvizjeje, Ristani njoftoi largimin përfundimtar edhe nga posti i nënkryetares, ndërsa tashmë dorëheqja e Hoxhës shton një tjetër ndryshim në administratën e lartë të Bashkisë së Tiranës.
