Kryeministri Edi Rama ka reaguar ndaj deklaratës të Partisë Demokratike Evropianë, pas qëndrimit të tyre lidhur me tensionet dhe përplasjet e një dite më parë gjatë protestës përpara Parlamentit.
Rama kundërshton cilësimin si “kundërshtim” të veprimeve të protestuesve, duke theksuar se deputetët u penguan të hynin në seancën hapëse të Parlamentit. Ai i cilësoi Demokratët Evropianë si “demokratë dembelë”, ndërsa i akuzoi se po gjykojnë situatën “nga rehatia e tastierës”.
Sipas kryeministrit, deputetë nga e majta dhe e djathta u detyruan të kalonin mes një “korridori sharjesh dhe dhune fizike” për të hyrë në Parlament, ndërsa ndaj tyre u hodhën vezë dhe madje edhe gurë.
Rama solli në vëmendje edhe rastin e një deputeteje, të cilën e përshkroi si një akademike të respektuar dhe mbrojtëse të të drejtave të grave, duke thënë se ajo u fye dhe u keqtrajtua teksa përpiqej të hynte në Parlament.
Kreu i qeverisë akuzoi Demokratët Evropianë se po mbështesin sjellje të tilla dhe po i paraqesin ato si kundërshtim demokratik. “A nuk ju vjen turp të mbështesni një sjellje kaq të neveritshme dhe ta shisni atë si kundërshtim demokratik?”, shkruan Rama.
Ai i sfidoi gjithashtu të reagojnë për episodet e dhunës ndaj deputetëve, duke i pyetur nëse shqetësimi i tyre për demokracinë “përfundon aty ku fillojnë faktet e pakëndshme”.
Në përfundim, Rama u kërkoi Demokratëve Evropianë që të “lënë Shqipërinë të qetë”, ndërsa mbrojti nivelin e demokracisë në vend.
“Shqipëria është një vend realisht i lirë dhe shumë më demokratik sesa politika juaj mendjengushtë”, shkruan Rama, duke shtuar se vendi nuk meriton “të bëhet çamçakëz në gojët mediokre të njerëzve që i shkëmbejnë faktet me angazhim të lirë politik”.
