Kreu i PD, Sali Berisha ka reaguar lidhur me zhvillimet në procesin gjyqësor për dosjen “Partizani”, ku është thirrur si dëshmitar kryeministri Edi Rama.
Në një deklaratë për mediat jashtë ambienteve të Parlamentit, Berisha theksoi se përballja në gjykatë duhet të jetë publike dhe transparente, duke kërkuar që seanca të zhvillohet në prani të mediave. Sipas tij, opinioni publik duhet të njihet drejtpërdrejt me rolin e Ramës në këtë çështje dhe me vendimet që, sipas opozitës, lidhen me ndryshime të destinacionit të pronave.
“Do jemi ballëpërballë dhe thojini të bëhet burrë, të mos kërkojë seancë pa media, por të kërkojë mediat aty dhe të vijnë të shohin shqiptarët se cili është Edi Rama në atë aferë dhe çfarë aktesh korruptive ka kryer ai duke ndryshuar destinacion, pa asnjë kërkesë nga pronarët”, tha Berisha.
Ai u shpreh gjithashtu se kërkesa për thirrjen e kryeministrit si dëshmitar është bërë prej kohësh, duke pretenduar se në dosje ekzistojnë disa vendime të firmosura prej tij, të cilat, sipas Berishës, duhet të shqyrtohen dhe verifikohen nga drejtësia.
“Është kërkuar me kohë thirrja e Edi Ramës, pasi në atë dosje Edi Rama ka mbi 12 firma ose 10 firma, se tani duhet t’i gjej, t’i numëroj. Prej tyre në shkelje flagrante të ligjit dhe i ndëshkuar nga gjykata për to dhe prokuroria, mercenarët e Ramës nuk e thirrën një herë kur ne kërkuam. Përkundrazi, akuzuan Sali Berishën për gjëra që s’kishin asnjë lidhje me to.”, tha lideri demokrat.
