Në Dhomat e Specializuara të Kosovës në Hagë është përmbyllur të hënën procesi gjyqësor ndaj ish-presidentit të Kosovës, Hashim Thaçi, Bashkim Smakajt, Isni Kilajt, Fadil Fazliut dhe Hajredin Kuçit, të akuzuar në çështjen që lidhet me pengimin e administrimit të drejtësisë.
Në seancën e fundit të shqyrtimit gjyqësor, palët iu përgjigjën pyetjeve të gjyqtarit, ndërsa Zyra e Prokurorit të Specializuar (ZPS) përsëriti kërkesën që të akuzuarit të shpallen fajtorë.
“Nuk ka pasur asnjëherë një çështje të tillë, një ish-burrështetas që është në gjykim për krime lufte dhe krime kundër njerëzimit, bashkëpunon dhe jep udhëzime për të penguar zyrtarët për të ushtruar detyrat e tyre”, deklaroi prokurori Matt Halling.
Mbrojtja e Thaçit kundërshtoi mënyrën se si Prokuroria është mbështetur në transkriptet e paraqitura gjatë procesit, duke argumentuar se ato nuk mund të shërbejnë si bazë për të vërtetuar fajësinë.
“Shpallja fajtor në këtë çështje nuk mund të bazohet vetëm në shkallë të gjerë në transkriptet e ZPS-së. Personat që i kanë bërë këto transkripte janë të panjohur dhe mbrojtja nuk e ka pasur mundësinë që t’i marrë në pyetje ata”, deklaroi avokatja mbrojtëse e Thaçit, Sophie Menegon.
Qëndrim të ngjashëm mbajti edhe mbrojtja e Bashkim Smakajt. Avokati Jonathan Elystan Rees kundërshtoi vlerën provuese të dokumenteve të paraqitura nga Prokuroria.
“Mund të quhen çfarëdo lloj dokumenti tjetër, por nuk mund të quhen në asnjë mënyrë prova me vlerë provuese”, deklaroi ai, duke ngritur pikëpyetje edhe për mënyrën e transkriptimit të zërave, emrave dhe tingujve të dëgjuar në incizime.
Edhe ekipet mbrojtëse të Isni Kilajt, Fadil Fazliut dhe Hajredin Kuçit kërkuan vendime liruese, duke argumentuar se klientët e tyre nuk kanë kryer veprat penale për të cilat akuzohen.
Avokati i Kilajt, Iain Edwards, deklaroi se “i vetmi verdikt në këtë rast do të ishte verdikti i pafajësisë”, ndërsa avokati i Fazliut, David Young, tha se “verdikti i saktë, i duhur, është ai i pafajësisë ndaj z. Fazliu, për të dy akuzat”.
Mbrojtja e Hajredin Kuçit argumentoi se Prokuroria nuk kishte paraqitur fakte konkrete që do ta lidhnin atë me veprimet e pretenduara. Avokati Alexander Admiraal tha se ZPS-ja i kishte kushtuar Kuçit vetëm katër paragrafë dhe se në to nuk identifikohej ndonjë dëshmitar që ai mund të kishte kontaktuar, ndonjë mesazh që mund të kishte dërguar apo ndonjë shënim të tij.
Me përfundimin e shqyrtimit gjyqësor, tashmë pritet që trupi gjykues të caktojë datën për shpalljen e aktgjykimit në këtë çështje.
Thaçi, Smakaj, Kilaj, Fazliu dhe Kuçi akuzohen se, në bashkëkryerje, kanë ndërmarrë veprime për të ndikuar te dëshmitarët e procesit kryesor për krime lufte dhe krime kundër njerëzimit, ku ish-presidenti Thaçi është një nga të akuzuarit.
Ndërkohë, vëmendja në Hagë zhvendoset edhe te 16 shtatori, kur pritet të jepet vendimi në procesin kryesor ndaj Hashim Thaçit për krime lufte dhe krime kundër njerëzimit.
