Policia e Tiranës ka ndërmarrë një operacion antidrogë që nisi që prej mbrëmjes së djeshme, duke zbuluar një laborator droge të fshehur në disa ndërtesa të vjetra që më parë shërbenin si magazina shtetërore. Ndërtesat ishin të mbrojtura nga roje, duke ngritur dyshime mbi aktivitetin e paligjshëm që zhvillohej brenda tyre.
Policia e Tiranës ka dhënë informacion zyrtar për laboratorin e drogës që u gjet në zonën e Selitës në kryeqytet në një godinë të vjetër që dikur i përkiste shtetit.
Sipas policisë, gjatë orëve të para të mëngjesit, shërbimet e Komisariatit të Policisë Nr. 2 kanë ndërhyrë në ambientet e një magazine të vjetër dykatëshe, në rrugën “Hamdi Pepa”, Selitë, ku nga informacionet e siguruara nga inteligjenca policore, dyshohej se kultivoheshin bimë narkotike, me anë të llambave.
“Nga kontrollet, në katin e dytë të këtij objekti, i cili nga verifikimet rezulton i privatizuar nga shtetasit A. C., K. K. dhe V. S., shërbimet e Policisë gjetën të kultivuara në vazo plastike, 105 bimë të dyshuara narkotike Cannabis Sativa.
Për rastin janë shoqëruar në ambientet e Policisë, disa shtetas, ndërkaq një grup i posaçëm hetimor po punon në vendngjarje, për të zbardhur dhe dokumentuar ligjërisht, rrethanat.
Në përfundim të veprimeve procedurale do të japim njoftim të detajuar për këtë rast”, deklaron Policia.
