Në Gjykatën e Posacme po shqyrtohet në seancë paraprake kërkesa e SPAK për kalimin për gjykim të dosjes penale ndaj grupit të parë të personave të pandehur për aferën e inceneratorit të Tiranës.
Disa prej të pandehurve pritet të kërkojnë gjykim të shkurtuar. Më kryesori ndër ish-zyrtarët nën akuzë është ish-ministri i Mjedisit Lefter Koka.
Por ndërkohë në dosjen hetimore dalin në dritë detaje të reja ku ndër të tjera thuhet se projekti I inceneratorit të Tiranës, ka qenë i papërballueshëm për buxhetin e shtetit.
Një raport i Kontrollit të Lartë të Shtetit i vitit 2019, lidhur me projektin koncesionar të inceneratorit të Tiranës ka konstatuar se “në momentin e miratimit të studimit të fizibilitetit fondet nuk kanë qenë të parashikuara në projekt buxhetin afatmesëm.
Projekti koncesionar PPP “ndërtim landfilli, inceneratori dhe rehabilitimi i venddepozitimeve ekzistuese Tiranë do të realizohej në shumën 130.883.750 euro me mbështetje nga qeveria shqiptare dhe 91.784.500 eurp pa tvsh nga buxheti i Bashkive në përbërje të qarkut Tiranë.
Vetëm në vitin 2018 përmes VKM nr.320 botuar në fletoren zyrtare, me propozim të MIE është vendosur “përdorimi i fondeve buxhetore të vitit 2018, miratuar nga për Ministrinë e Infrastrukturës dhe Ekonomisë në programin e menaxhimit të mbetjeeve urbane për financimin e njësive të qeverisjes vendore të Qarkut Tiranës/Bashkia Tiranë për përmbushjen e detyrimeve që rrjedhin nga kontrata koncesionare.
“Projekti koncesionar për inceneratorin e Tiranës është miratuar – thekson SPAK – pa marrë konfirmimet e nevojshme nga të gjitha njësitë e vetëqeverisjes vendore të qarkut Tiranës mbi aftësinë e tyre për ta përballuar projektin financiarisht dhe pa marrë konfirmimin e MIE në lidhje me tarifën e shitjes së energjisë së prodhuar.
Qarku Tiranës përfshin 4 njësi të qeverisjes vendore që nuk janë shprehur në lidhje me dakordësinë për këtë projekt dhe jo vetëm Bashkinë e Tiranës”.
Kryebashkiaku i Tiranës Erjon Veliaj ka marrë përsipër financimin për bashkinë Tiranë, pa e kaluar për miratim në këshillin Bashkiak dhe pa patur fonde në dispozicion.
Është konsatuar po ashtu se projekti koncesionar paraqitet i paqëndrueshëm dhe me pasaktësi materiale.
