Suela Beluli dhe Edmond Kaloshi garojnë për të marrë drejtimin e prokurorisë së Durrësit. KLP po shqyrton kandidaturat, ndërsa Belulin e ka komanduar si drejtuese edhe për 3 muaj të tjerë.
Në krye të prokurorisë Vlorë është caktuar Erjon Shqarri, pas arrestimit të ish-drejtuesit Aurel Zarka, ndërsa drejtimin e prokurorisë së Lezhës e merr përkohësisht Erjon Shehaj.
Mbledhja e KLP
Pas shqyrtimit të relacioneve të përgatitura nga Komisioni i Zhvillimit të Karrierës, Këshilli vendosi unanimisht caktimin e përkohshëm të tre (3) prokurorëve në pozicionin e drejtuesve si më poshtë:
Erjon Shqarri si drejtues në Prokurorinë pranë Gjykatës së Shkallës së Parë të Juridiksionit të Përgjithshëm, Vlorë.
Erjon Shehaj si drejtues në Prokurorinë pranë Gjykatës së Shkallës së Parë të Juridiksionit të Përgjithshëm, Lezhë.
Suela Beluli si drejtuese në Prokurorinë pranë Gjykatës së Shkallës së Parë të Juridiksionit të Përgjithshëm, Durrës.
Në përfundim, Këshilli miratoi kualifikimin e kandidatëve Suela Beluli dhe Edmond Kaloshi për pozicionin e drejtuesit të Prokurorisë pranë Gjykatës së Shkallës së Parë Durrës, përmes procedurës së ngritjes në detyrë. Pas shortit për zgjedhjen e relatorëve që do të kryejnë procedurën e verifikimit, u caktuan z. Erind Mërkuri për Suela Belulin dhe z. Olger Eminaj për Edmond Kaloshin.
