Pushimet nuk janë më vetëm plazh dhe relaks, trendi i ri që po i bën njerëzit të udhëtojnë mijëra kilometra për t’u stërvitur
Një udhëtim 26-orësh vetëm për të vrapuar një maratonë në anën tjetër të botës mund të duket i tepruar, por për një numër gjithnjë e më të madh njerëzish po bëhet mënyra e re për të kaluar pushimet.
Vogue shkruan për rritjen e “sweat-jetting”, një trend ku destinacioni i pushimeve nuk zgjidhet më vetëm për plazhet, hotelet apo atraksionet turistike, por për aktivitetin fizik që mund të zhvillohet atje. Maratona, ecje në male, kampe fitnesi, çiklizëm, yoga dhe programe rikuperimi po bëhen arsye më vete për të marrë avionin.
Një nga personat që Vogue sjell si shembull është Josue De Paz, i cili udhëtoi rreth 26 orë për të mbërritur në Australi dhe për të marrë pjesë në maratonën e Sydney-t. Për të, gara nuk ishte thjesht një aktivitet gjatë pushimeve, por vetë arsyeja e udhëtimit.
Dhe duket se nuk bëhet fjalë për një fenomen të izoluar. Tripadvisor e ka renditur “sweat-jetting” si trendin kryesor të udhëtimeve për vitin 2026. Të dhënat e platformës tregojnë se rezervimet e eksperiencave janë rritur me 18% krahasuar me një vit më parë, ndërsa turistët po planifikojnë gjithnjë e më shumë udhëtime rreth një aktiviteti konkret.
Në vend që të zgjedhin hotelin dhe më pas të kërkojnë çfarë mund të bëjnë aty pranë, shumë udhëtarë po veprojnë në të kundërt: fillimisht zgjedhin maratonën, malin apo aktivitetin sportiv dhe vetëm më pas rezervojnë fluturimin dhe akomodimin.
Kështu, një person mund të shkojë në Chamonix për të vrapuar në shtigjet malore, në Patagoni për ecje dhe ngjitje, apo në Marrakech për të kombinuar aktivitetin fizik me hammam dhe rikuperim.
Edhe kjo pjesë e pushimeve po ndryshon. Pas stërvitjes, turistët po shpenzojnë më shumë për masazhe, sauna, spa dhe trajtime tradicionale. Sipas të dhënave të Tripadvisor, rezervimet për hammam dhe banja turke janë rritur me 74%, masazhet me 42%, saunat me 38% dhe shërbimet “day spa” me 37%.
Trendi është veçanërisht i fortë te brezat e rinj. Rreth 37% e “sweat-jetters” janë pjesë e Gen Z dhe 43% janë millennials. Ata gjithashtu rezultojnë më të prirur të zgjedhin udhëtime dhe eksperienca premium.
Kështu, edhe ideja tradicionale e pushimeve po ndryshon. Për një pjesë të turistëve, të largohesh nga rutina nuk do të thotë më të kalosh një javë pa bërë asgjë. Përkundrazi, sfida fizike, mirëqenia dhe rikuperimi po bëhen vetë pushimet.
