Komisioni Qendror i Zgjedhjeve (KQZ) ka miratuar planin kohor të aktiviteteve zgjedhore për zgjedhjet e parakohshme për Kuvendin e Republikës së Kosovës, të cilat do të mbahen më 7 qershor 2026.
Sipas këtij plani, nga data 1 maj deri më 7 maj 2026, partitë politike të regjistruara në KQZ duhet të deklarojnë pjesëmarrjen ose mospjesëmarrjen e tyre në zgjedhje. Brenda të njëjtit afat duhet të deklarohen edhe koalicionet mes partive politike.
Nga 2 maji deri më 10 maj 2026 është paraparë afati për certifikimin e partive të reja politike që synojnë të marrin pjesë në zgjedhjet parlamentare.
Ndërkohë, dorëzimi i listave të kandidatëve për deputetë nga subjektet politike do të bëhet nga 2 maji deri më 12 maj 2026.
Fushata zgjedhore zyrtare do të nisë më 28 maj dhe do të zgjasë deri në mëngjesin e 7 qershorit, ditën kur qytetarët do t’u drejtohen kutive të votimit.
Sa i përket votuesve jashtë Kosovës, periudha e regjistrimit do të fillojë më 6 maj dhe do të përfundojë më 17 maj, ndërsa votimi përmes postës do të zhvillohet nga 25 maji deri më 6 qershor 2026.
