Nga Ergys Mërtiri
Do ulim dënimet për të korruptuarit.
Kodi i ri penal, përveç budallëqeve ka dhe shumë shejtanllëk. Ai parashikon që dënimi për korrupsionin të ulet nga maksimumi 12 në 8 vjet, ndërsa për shpërdorimin e detyrës, përveç uljes së dënimit të futet dhe detyrimi për të vërtetuar qëllimsinë e shpërdoruesit, në provën për veprën penale. Pas zbutjes së dënimit për kriminelët e dënuar me burgim të përjetshëm, të korruptuarit janë grupi i dytë që prek zemërgjerësinë e këtij shteti.
Ky kod penal reflekton pikëpamjen e Kryeministrit për krimin. Shtypja kokën popullit hallexhiut, atij që nuk paguan energjinë, ujin, apo atij që shan e përqesh qeverinë apo kapet në demostratë duke bllokuar rugën, dhe fale kriminelin e hajdutin! Burg për popullin, mëshirë për kriminelët! Sipas Edi Ramës, krim bëjnë vetëm të dobtit.
E gjithë kjo vjen në një situatë kur ne kemi ngritur prokurori dhe gjykata speciale për të luftuar krimin dhe korrupsionin. Drejtësia speciale është diçka e jashtëzakonshme që nuk pranohet në shoqëri normale. Ne kemi pranuar ta bëjmë këtë sepse kemi rënë dakort që ky vend nuk është normal, për shkak se krimi dhe korrupsioni janë kthyer në një kancer që po shkatërron shoqërinë.
Në këtë situatë, të bësh ligje të zbutura për të korruptuarit dhe kriminelët, do të thotë se, në situatë të jashtëzakonshme, ti mban anën e të keqes që kërcënon vendin. Mëshira dhe zbutja e mjekimit kundër kancerit tregon se qeveria është në anën e sëmundjes kundër shëndetit. Qeveria në këtë rast i bie të jetë vetë kanceri.
