Një zhvillim i papritur ka përfshirë Princin Harry, pasi organizata bamirëse Sentebale, të cilën ai e ka bashkëthemeluar, ka ngritur një padi ndaj tij për shpifje, raportojnë mediat ndërkombëtare, përfshirë BBC.
Sipas të dhënave nga regjistrat gjyqësorë, çështja është depozituar më 24 mars, me Sentebale në rolin e paditëses. Deri në këto momente, as përfaqësuesit e princit dhe as ata të organizatës nuk kanë dhënë detaje të mëtejshme mbi natyrën e akuzave.
Kjo situatë vjen pas largimit të Princit Harry nga organizata vitin e kaluar, pas mosmarrëveshjeve të forta lidhur me drejtimin dhe menaxhimin e saj.
Ndërkohë, familja mbretërore britanike vijon të jetë në qendër të vëmendjes publike. Vetëm pak javë më parë, u rikthyen në fokus edhe akuzat e vjetra që lidhen me Princin Andrew dhe lidhjet e tij me Jeffrey Epstein, çështje për të cilën ai është marrë në pyetje dhe ka dhënë deklarimet e tij për autoritetet.
