Ndryshimi i pushtetit pas kryengritjes së qershorit 1924, solli edhe ndryshimin e drejtimit të të Zyrës Sekrete të MPB, pavarësisht se drejtuesi i ri, Musa Puka (1891-1942) do të ishte deri në fund të detyrës zëvendësisht (i komanduar). Periudha e tij në detyrë: 31 gusht 1924 deri më 20 janar 1925, me pagë 380 franga ari.
Ai ishte një ushtarak që punonte te Zyra Sekrete nga viti 1922. U nxor në lirim, por u emërua kryetar komune. Pastaj u mor me tregti si sekretar i shoqërisë së çimentos. Më 1935 burgoset 3 vjet si i përzier në kryengritjen e Fierit. Pas daljes nga burgu, në v.1938 emërohet nënprefekt në Mallakastër.
Me ndryshimin e pushtetit pas 7 prillit 1939, aktivizohet menjëherë në Zyrën Sekrete të MPB-së, ndërsa emërohet inspektor i MPB-së më 12 tetor 1939. Në shënimet e pas vitit 1939, Puka shënohet si shumë mik me Maliq Bushatin dhe armik me Musa Jukën nga viti 1926.
Punoi në Zyrën Sekrete e më pas në Zyrën Politike dhe të Personelit 1939 – 1941, për aq kohë sa ishte ministër Maliq Bushati. Me ardhjen në pushtet të qeverisë së re të Mustafa Krujës, largohet nga Tirana. Më 19 janar 1942 emërohet prefekt i Elbasanit.
Vritet nga komunistët me atentat në këtë qytet (njē e shtënë pushke nga punishtja e orizit) më 2 tetor 1942, vetëm pak ditë pas mbledhjes së Pezës, ku kishte qenë planifikuar edhe pjesëmarrja e tij. Emri i atentatorit nuk u bë kurrë publik, megjithëse një emër përflitej gjithnjë në Elbasan.
