Kanë dalë detaje të tjera në lidhje me operacionin e gjerë policor në Greqi për kapjen e një 41-vjeçari shqiptar, Gentian Cipi, i cili u arratis gjatë transferimit nga burgu i Nigritës drejt Spitalit të Përgjithshëm të Serresit.
Sipas mediave greke, policia ka gjetur një nga dy automjetet që dyshohet se janë përdorur nga bashkëpunëtorët e të burgosurit. Këta të fundit arritën ta merrnin Gentian Cipin nga oborri i spitalit, pasi u paraqitën si efektivë policie dhe kërcënuan me kallashnikov punonjësit e sigurisë së burgut.
Gjatë arratisjes, një nga automjetet dyshohet se është përfshirë në një aksident, duke përfunduar mes kallamishteve. Një prej personave që ndodhej në makinë dyshohet se është plagosur në kokë, pasi në xhamin e përparmë të automjetit janë konstatuar gjurmë gjaku.
Policia greke ka mbledhur prova dhe materiale nga automjeti, të cilat do të analizohen për të identifikuar dhe lokalizuar autorët. Brenda makinës u gjetën gjithashtu një kallashnikov dhe municione.
Ndërkohë, një tjetër automjet është gjetur plotësisht i djegur në zonën e Vrasnas, në bashkinë Volvi. Ende nuk është konfirmuar nëse makina lidhet me arratisjen, por kjo pistë po hetohet nga autoritetet.
Si ndodhi arratisja
Sipas informacioneve të deritanishme, rreth orës 23:00, 41-vjeçari ishte transportuar nga burgu i Nigritës drejt Spitalit të Serresit, konkretisht në klinikën psikiatrike, pasi kishte deklaruar se nuk ndihej mirë.
Transportimi u krye nga një ekip i posaçëm i sigurisë së jashtme të burgut. Sipas televizionit publik grek ERT, në spital u dërguan gjithsej tre të burgosur, të shoqëruar nga pesë efektivë.
Fillimisht, tre prej efektivëve shoqëruan një nga të burgosurit brenda spitalit, ndërsa dy të tjerët qëndruan pranë mjetit të transportit së bashku me dy të burgosurit e tjerë, mes të cilëve ndodhej edhe 41-vjeçari shqiptar.
Në momentin kur automjeti i burgut ndodhej në oborrin e spitalit, në vendngjarje mbërritën dy makina të pajisura me sinjalistikë që i bënte të dukeshin si automjete policie.
Nga makinat zbritën persona të armatosur rëndë, të veshur me uniforma të ngjashme me ato të njësive speciale greke OPKE dhe me fytyrat e mbuluara me kapuçë.
Nën kërcënimin e armëve, autorët neutralizuan dhe çarmatosën dy efektivët e sigurisë, morën me vete 41-vjeçarin dhe u larguan me shpejtësi.
Zëdhënësja e Policisë greke, Konstantia Dimoglidou, deklaroi se, bazuar në dëshmitë e efektivëve që morën pjesë në transferim, personat që organizuan arratisjen ishin paraqitur si policë, kishin armë të rënda dhe përdornin automjete që ngjanin me ato të policisë.
Kush është 41-vjeçari shqiptar Gentian Cipi
Sipas medias greke, Gentian Cipi është një shtetas shqiptar 41 vjeç, i dënuar për vepra penale që lidhen me trafikun e drogës dhe tentativën e vrasjes.
Ai rezulton të ketë qenë i përfshirë edhe në disa incidente të tjera, mes tyre një ngjarje me të shtëna me armë zjarri në mes të ditës në Selanik.
Sipas autoriteteve greke, Cipi ndodhej në burg pasi ishte arrestuar nga strukturat kundër krimit të organizuar për tentativë vrasjeje. Ai ishte burgosur në vitin 2025 për një ngjarje të ndodhur në zonën e Pylaia-s në vitin 2024.
Policia greke vijon kërkimet intensive për kapjen e 41-vjeçarit dhe identifikimin e bashkëpunëtorëve që organizuan arratisjen.
