Gjykata e Posaçme e Apelit për Korrupsionin dhe Krimin e Organizuar ka lënë në fuqi sekuestron preventive të vendosur ndaj pasurive të biznesmenit Orest Sota, në kuadër të procedimit penal nr. 287/1 të vitit 2021 që po hetohet nga SPAK.
Me vendimin e shpallur këtë të mërkurë, gjyqtari Dhimitër Lara miratoi urdhrin e sekuestros preventive të dhënë më 10 qershor 2026 nga GJKKO, duke rrëzuar ankimet e paraqitura nga Orest Sota, familjarë të tij dhe disa shoqëri tregtare të përfshira në masën e sigurimit pasuror.
Ndërkohë, Apeli vendosi edhe mospranimin për shqyrtim të ankimit të ngritur nga Orest Sota dhe një prej shoqërive tregtare të përfshira në procedurë.
VNA ka raportuar më herët se SPAK dyshon se një pjesë e pasurive të sekuestruara lidhen me veprimtari kriminale dhe ka kërkuar vendosjen e sekuestros preventive për të garantuar konfiskimin e tyre në përfundim të procesit, nëse akuzat provohen në gjykatë.
