1 Qershor. Në një tryezë të rrumbullakët 11 inspektorë të Inspektoriatit Shtetëror të Punës dhe Shërbimeve Shoqërore, bëjnë një foto dhe më pas e postojnë në rrjetet sociale për të ndërgjegjësuar punëtorët për sigurinë në punë.
2 Qershor. Një 60-vjeçar është dërguar në spital pa shenja jete në Bulqizë.Dyshohet se viktima është aksidentuar gjatë punës në një subjekt minerar në Bulqizë.
2 Qershor. 62-vjeçari në Sarandë bie nga skela, përfundon në koma. Serfet Ziflaj bie nga një lartesi 4 metra nga kantieri ku punonte.
27 Maj. 53 vjeçari Adrian Fejzullahu bie nga kati i shtatë në pallatin ku po punonte. Humb jetën.
22 Maj. 24 vjeçari Jurgen Veshi humb jetën në guroren e Bratajt. Veshi punonte me skrep në guroren e Bratajt
21 Maj. 29-vjeçari Armond Peshku, i cili humbi jetën pas një aksidenti në një minierë në Martanesh të Bulqizës.
11 Maj. Preng Gjoni, 50-vjeç humbi jetën në Shëngjin teksa ishte duke punuar në kantierin e një pallati.
9 Maj. Emiljano Frroku 28-vjeç, ka humbur jetën , pasi ka rënë nga një lartësi në pallatin ku punonte në Shëngjin.
Ne vetëm një muaj 7 persona kanë humbur jetën si pasojë e mosrespektimit të kushteve të sigurisë teknike në punë. Inspektoriati i punës që duhet të jetë në të gjitha vendet për të kontrolluar marrëdhënien e punës, kushtet e punës, mbrojtjen në punë dhe ruajtjen e shëndetit të punëtorëve në përgjithësi duket se ka marre masa duke "punuar" për të rritur kulturën e ndërgjegjësimit.
"Te punojmë së bashku për të rritur kulturën e ndërgjegjësimit për të garantuar vende pune të sigurta", ky është reagimi që vjen pas 6 humbje jetësh në kantiere ndërtimi.
A thua problemi që punëtorët kanë sot është mungesa e kulturës së ndërgjegjësimit? Apo goja e mbyllur përballë padrejtësive, nga nevoja për pak para. Shpresojmë që pas postimit në facebook që ka hedhur Inspektoriati Shtetëror i Punës të mos kemi më lajme tragjike, nje postim me 11 inspektorë të buzëqeshur mbase zgjidh problemin.
