Një zjarr i fuqishëm ka përfshirë pasditen e sotme zonën pyjore pranë uzinës së Poliçanit. Flakët janë përhapur me shpejtësi dhe kanë arritur afër “Zonës C”, ku ndodhen magazina që mbajnë lëndë plasëse, duke shtuar ndjeshëm nivelin e rrezikut.
Në vendngjarje ndodhen forcat zjarrfikëse dhe trupat e ushtrisë, ndërsa për ndërhyrje ajrore është angazhuar edhe një helikopter i nisur nga baza e Kuçovës.
Kryetari i Bashkisë së Poliçanit, Adriatik Zotka, është i pranishëm në terren dhe ka kërkuar ndihmë urgjente. Ai ka paralajmëruar se në rast shpërthimi të magazinave, rreziku për lagjen e afërt Kalluç – vetëm 200 metra larg – do të ishte i jashtëzakonshëm.
